ເປີດສູນບໍລິການຂໍ້ມູນສຳລັບຊ່ວຍເຫຼືອແຮງງານລາວທີ່ກັບມາຈາກຕ່າງປະເທດ

👏 ເປີດສູນບໍລິການຂໍ້ມູນສຳລັບຊ່ວຍເຫຼືອແຮງງານລາວທີ່ກັບມາຈາກຕ່າງປະເທດ

ກະຊວງແຮງງານ ແລະ ສະຫວັດດີການສັງຄົມ ໄດ້ຕົກລົງອະນຸມັດສ້າງສູນບໍລິການຂໍ້ມູນ ສຳລັບຊ່ວຍເຫຼືອແຮງງານລາວທີ່ກັບມາຈາກຕ່າງປະເທດ ເພື່ອເປັນສູນທົດລອງຕົວແບບຂອງການບໍລິການຂໍ້ມູນຂ່າວສານຕະຫຼາດແຮງງານ ຄົບວົງຈອນ.

ຄືດັ່ງຮູ້ນຳກັນແລ້ວວ່າ ຈຳນວນແຮງງານລາວທີ່ກັບຈາກຕ່າງປະເທດ ມາຮອດປັດຈຸບັນມີຫຼາຍກວ່າ 200.000 ຄົນ, ແຮງງານລາວທີ່ກັບມາລ້ວນມີປະສົບການເຮັດວຽກໃນຫຼາກຫຼາຍຂະແໜງການ ທັງຂະແໜງປູກຝັງ, ລ້ຽງສັດ, ການປະໂມງ, ອຸດສາຫະກຳປຸງແຕ່ງອາຫານ, ກໍ່ສ້າງ, ການຄ້າຂາຍຍ່ອຍ, ແມ່ບ້ານໃນໂຮງແຮມ, ເຮືອນພັກ ແລະ ອື່ນໆ,

ແຕ່ການກັບຄືນປະເທດແບບບໍ່ໄດ້ວາງແຜນ ເຮັດໃຫ້ເຂົາເຫຼົ່ານັ້ນພົບພໍ້ຫຼາຍບັນຫາ, ເພາະໃນຄວາມຄາດຫວັງທີ່ຈະກັບຄືນໄປເຮັດວຽກຢູ່ຕ່າງປະເທດຂອງພວກເຂົາເຫຼົ່ານັ້ນຍັງມີຫຼາຍຄວາມສ່ຽງ ໂດຍສະເພາະສະພາບການແຜ່ລະບາດຂອງພະຍາດໂຄວິດ-19 ຍັງສຶບຕໍ່ແຜ່ລາມ ແລະ ບໍ່ມີທ່າທີ່ຈະຫຼຸດລົງ, ເສດຖະກິດຂອງປະເທດປາຍທາງມີສະພາວະທົດຖອຍ, ຫຼາຍຫົວໜ່ວຍແຮງງານໄດ້ຮັບຜົນກະທົບ ແລະ ໄດ້ຫຼຸດຜ່ອນຈຳນວນແຮງງານ, ບາງໂຮງຈັກໂຮງງານ, ໂຮງແຮມ ແລະ ຮ້ານອາຫານໄດ້ປິດລົງ ບັນຫາດັ່ງກ່າວໄດ້ແຜ່ລາມໄປຮອດທຸກຂົງເຂດ ລວມທັງຂະແໜງການປູກຝັງ, ລ້ຽງສັດ ແລະ ການປະມົງ;

ພ້ອມກັນນັ້ນ, ການຮັບເຂົ້າເຮັດວຽກໃນສະຖານທີ່ຕ່າງໆມີຫຼາຍເງື່ອນໄຂໃໝ່ເກີດຂຶ້ນ ບັນຫາດັ່ງກ່າວໄດ້ສ້າງຜົນກະທົບຢ່າງໃຫຍ່ຫຼວງໃຫ້ແກ່ແຮງງານທີ່ກັບມາ, ຈຳນວນແຮງງານເຫຼົ່ານັ້ນບໍ່ສາມາດຊອກຫາລາຍຮັບ, ຂາດຂໍ້ມູນໃນການກັບເຂົ້າສູ່ຕະຫຼາດແຮງງານ.

ສູນດັ່ງກ່າວຈະເຮັດໜ້າທີ່ໃນການຊອກຫາຂໍ້ມູນຕຳແໜ່ງງານວ່າງ ນຳບັນດາບໍລິສັດ, ໂຮງຈັກໂຮງງານ, ໂຄງການລົງທຶນ ລວມໄປເຖິງຄົວເຮືອນ ເພື່ອເກັບກຳລາຍລະອຽດຕ່າງໆ ເຊັ່ນ: ເງິນເດືອນ, ສະຫວັດດີການ, ເງື່ອນໄຂການສະໝັກ ແລະ ອື່ນໆ ເພື່ອນຳໄປເຜີຍແຜ່ໃຫ້ຜູ້ຊອກວຽກ ໂດຍສະເພາະແຮງງານທີ່ຢູ່ພາຍໃນສູນຈຳກັດບໍລິເວນ,

ເພື່ອຊ່ວຍເຫຼືອໃຫ້ແກ່ເຂົາເຫຼົ່ານັ້ນ ມີຂໍ້ມູນ ແລະ ສາມາດກຽມໂຕເພື່ອເຂົ້າສະໝັກ, ສຳພາດ ແລະ ປະກອບອາຊີບ ຕາມທັກສະສີມືຂອງຕົນ ພາຍຫຼັງອອກຈາກສູນຈຳກັດບໍລິເວນໄດ້ຢ່າງວ່ອງໄວ ແລະ ທັນການ.

ນອກຈາກການເກັບກຳຕຳແໜ່ງງານວ່າງໃຫ້ແກ່ແຮງງານແລ້ວ, ທາງສູນກໍໄດ້ປະສານງານຫາແຕ່ລະແຂວງ ເພື່ອເກັບກຳຂໍ້ມູນຊີວະປະຫວັດຜູ້ຕ້ອງການສະໝັກວຽກ, ຜູ້ຕ້ອງການປະກອບອາຊີບອິດສະຫຼະ ແລະ ຜູ້ຕ້ອງການຝຶກສີມືແຮງງານ ເພື່ອນຳມາສະໜອງໃຫ້ຜູ້ຕ້ອງການແຮງງານ ສາມາດຕິດຕໍ່, ເລືອກ ເຟັ້ນແຮງງານທີ່ຕົນຕ້ອງການ ໂດຍແນໃສ່ແກ້ໄຂບັນຫາການວ່າງງານ ແລະ ສະພາບຕະຫຼາດແຮງງານໃນປັດຈຸບັນ.

ຈາກຂໍ້ມູນລາຍງານຫຼ້າສຸດຂອງສູນນັບແຕ່ວັນທີ 30 ສິງຫາ – 8 ກັນຍາ 2021 ພະນັກງານຂອງສູນສາມາດປະສານຂໍຂໍ້ມູນໄດ້ 165 ຫົວໜ່ວຍແຮງງານ, ມີ 416 ຕຳແໜ່ງງານ, ຕ້ອງການແຮງງານ 1.861 ຄົນ;

ຂໍ້ມູນທີ່ໄດ້ມານີ້ ແມ່ນຍັງເປັນສ່ວນນ້ອຍຈາກຂໍ້ມູນທັງໝົດໃນຕະຫຼາດແຮງງານ ຊຶ່ງປາສະຈາກບໍ່ໄດ້ທີ່ຕ້ອງການຄວາມຊ່ວຍເຫຼືອ, ການຮ່ວມມືຈາກສື່ຕ່າງໆທັງພາກລັດ ແລະ ເອກະຊົນ ລວມທັງອົງການຈັດຕັ້ງສາກົນ ໃນການໂຄສະນາປະຊາສຳພັນ, ຮຽກຮ້ອງມາຍັງແຮງງານ, ຫ້າງຮ້ານ, ບໍລິສັດ, ໂຮງຈັກໂຮງງານ, ໂຄງການລົງທຶນ ນຳໃຊ້ການບໍລິການຂອງສູນຜ່ານທາງເບີໂທສາຍດ່ວນ 1535, Page Facebook, Whatsapps, Line ID ເພື່ອເຮັດໃຫ້ ສູນດັ່ງກ່າວມີຄວາມເຂັ້ມແຂງ, ໄດ້ມີຂໍ້ມູນສະໜອງໃຫ້ແຕ່ລະຝ່າຍ ແລະ ພາກສ່ວນຕ່າງໆ ຢ່າງເປັນປົກກະຕິ.

ຂໍ້ມູນ​ຈາກ

About admin

Check Also

ແຊ໌ຕໍ່ ຈຳຄຸກ ຍິງໄວ 36 ປີ ຖານຄອບຄອງອາວຸດ

ຈຳຄຸກ ຍິງໄວ 36 ປີ ຖານຄອບຄອງອາວຸດ. ໃນວັນທີ 16 ສິງຫາ 2022, ສານປະຊາຊົນນະຄອນຫຼວງວຽງຈັນ ໄດ້ພິຈາລະນາຕັດສິນ ຈຳຄຸກ ນາງ ຝົນ ອາຍຸ …

Leave a Reply

Your email address will not be published.