Breaking News

ສສຊ ຊີ້!.​ ການຮຽນ​ອອນລາຍ​ ໄດ້ຮັບຮູບການຫຼາຍກວ່າຄຸນນະພາບ

ຂປລ​ ລາຍງານວ່າ: ໃນວາລະປະກອບຄໍາເຫັນຂອງສະມາຊິກສະພາແຫ່ງຊາດ (ສສຊ) ຕໍ່ການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2021 ຂອງລັດ ຖະບານ ໃນກອງຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ດໍາເນີນໃນປັດຈຸບັນນີ້.

ໜຶ່ງໃນບັນຫາພົ້ນເດັ່ນທີ່ ສສຊ ຫລາຍເຂດເລືອກ ຕັ້ງໄດ້ມີຄວາມເປັນຫ່ວງ ແລະ ຢີບຍົກຂຶ້ນມາສະເໜີໃນທີ່ປະຊຸມ ເພື່ອໃຫ້ ລັດຖະບານເບິ່ງຄືນ ກໍແມ່ນການຮຽນ-ການສອນ ໃນຮູບແບບທາງໄກ (ອອນລາຍ) ໃນໄລຍະທີ່ມີການລະບາດຂອງພະຍາດໂຄວິດ-19, ໂດຍສ່ວນ ຫລາຍເຫັນວ່າການຮຽນຜ່ານອອນລາຍ ຈະໄດ້ແຕ່ຮູບການຫລາຍກວ່າຄຸນພາບ.

ດັ່ງຄໍາເຫັນຂອງ​ ທ່ານ ແດງ ປະທຸມທອງ ສສຊ ເຂດເລກຕັ້ງທີ 18 ແຂວງ ໄຊສົມບູນ ຍົກໃຫ້ເຫັນວ່າ: ສະພາບການຮຽນ-ການສອນ ຜ່ານອອນລາຍຄືດັ່ງ ໄດ້ປະຕິບັດໃນປັດຈຸບັນນີ້, ເຫັນວ່າຍັງບໍ່ທັນມີຄວາມເປັນເອກະພາບກັນ, ໂດຍ ລວມເຫັນວ່າໄດ້ພຽງຮູບການ, ແຕ່ຄຸນນະພາບໃນການຮັບຮູ້ເຂົ້າໃຈຂອງນັກ ຮຽນ ແລະ ການເອົາໃຈໃສ່ຂອງຄູອາຈານແມ່ນບໍ່ສູງ, ບໍ່ມີປະສິດທິພາບ.

ຂະນະດຽວກັນ, ຂະແໜງການກ່ຽວຂ້ອງຍັງບໍ່ສາມາດສະຫລຸບໝາກຜົນ ຫລື ປະເມີນທາງດ້ານຄຸນນະພາບຂອງການຮຽນ-ການສອນໃນຮູບແບບດັ່ງກ່າວ ໄດ້ເປັນທີ່ຊັດເຈນ, ໂດຍສະເພາະຕົວເລກຂອງອັດຕາການເຂົ້າຮຽນຂອງ ນັກຮຽນ, ຄວາມສະດວກ ແລະ ຂໍ້ຫຍຸ້ງຍາກໃນການສິດສອນລະຫວ່າງຕົວເມືອງກັບເຂດຊົນນະບົດຫ່າງໄກສອກຫລີກ, ຂະນະທີ່ ຍັງມີຫລາຍທ້ອງຖິ່ນ ບໍ່ທັນມີສັນຍານໂທລະສັບ ຫລື ອິນເຕີເນັດ ໄປຮອດໄປເຖິງ.

ສະນັ້ນ ຂໍສະ ເໜີໃຫ້ລັດຖະບານ ຈົ່ງໄດ້ກວດກາ ແລະ ຊີ້ນໍາຂະແໜງການກ່ຽວຂ້ອງຕື່ມ ເພື່ອຄົ້ນຄວ້າ ແລະ ປະເມີນວ່າຄວນສືບຕໍ່ດໍາເນີນການຮຽນອອນລາຍ ຫລື ຈະຫັນໄປນໍາໃຊ້ຮູບແບບການຮຽນວິທີອື່ນທີ່ເໝາະສົມ ເພື່ອໃຫ້ຮັບປະກັນ ທາງດ້ານຄຸນນະພາບ ແລະ ປະສິດທິພາບຂອງການສຶກສາໃຫ້ແກ່ລູກຫລານ ພວກເຮົາໃນຕໍ່ໜ້າ.

ທ່ານ ຄໍາແສນ ສີສະວົງ ສສຊ ເຂດເລືອກຕັ້ງທີ 9 ແຂວງຊຽງຂວາງ ໄດ້ມີຄໍາເຫັນວ່າ: ເຖິງວ່າກະຊວງສຶກສາທິການ ແລະ ກິລາ ໄດ້ອອກຄໍາສັ່ງແນະນໍາກ່ຽວກັບການຮຽນ-ການສອນ ໃນໄລຍະເກີດການລະບາດຂອງພະຍາດ ໂຄວິດ-19 ນີ້ ໃຫ້ຮຽນຜ່ານລະບົບອອນລາຍ, ເຊິ່ງໃນຄວາມເປັນຈິງແລ້ວ ການຮຽນຮູບແບບດັ່ງກ່າວ ກໍມີຫລາຍປະເທດນໍາໃຊ້ໄດ້ຢ່າງມີປະສິດທິຜົນ, ເນື່ອງຈາກ ຖ້າຫາກພວກເຮົາສາມາດໝູນໃຊ້ລະບົບການສື່ສານທີ່ທັນສະໄໝນີ້ໄດ້ຢ່າງເຕັມສ່ວນ ກໍຈະເປັນໂອກາດໃໝ່ທີ່ຊ່ວຍເສີມສ້າງທາງດ້ານທັກສະ ແລະ ພັດທະນາຄວາມຮູ້ໃນດ້ານຕ່າງໆໃຫ້ແກ່ນັກຮຽນ-ນັກສຶກສາໄດ້ຢ່າງເລີກ ເຊິ່ງ ແລະ ກວ້າງຂວາງ.​

ແຕ່ບັນຫາຫຍຸ້ງຍາກຕໍ່ການຮຽນດັ່ງກ່າວນີ້ ກໍຍັງມີຫລາຍດ້ານຫຍຸ້ງຍາກ ແລະ ຂໍ້ຈໍາກັດຫລາຍດ້ານ ເປັນຕົ້ນແມ່ນການຂາດເຂີນ ອຸປະກອນ (ໂທລະສັບ-ຄອມພິວເຕີ) ຂອງນັກຮຽນ, ການຮຽນທີ່ບໍ່ປົກກະຕິ, ຜູ້ປົກຄອງນັກຮຽນຈໍານວນບໍ່ໜ້ອຍບໍ່ມີເວລາບອກສອນລູກຫລານໃນການຮຽນ ດັ່ງກ່າວ.

ພ້ອມທັງສະເໜີ ໃຫ້ລັດຖະບານຄົ້ນຄວ້ານະໂຍບາຍຊ່ວຍເຫລືອ ທາງດ້ານຄ່າຊົມໃຊ້ອິນເຕີເນັດໃຫ້ແກ່ຄູອາຈານ ແລະ ນັກຮຽນໄດ້ຍິ່ງເປັນການ ດີ.ແນວໃດກໍຕາມ, ຄໍາເຫັນຂອງ ສສຊ ສ່ວນຫລາຍໂດຍລວມແລ້ວ ເຫັນວ່າສອດຄ່ອງກັບການຕີລາຄາຂອງຄະນະປະຈໍາສະພາແຫ່ງຊາດ, ທີ່ສະເໜີ ໂດຍທ່ານ ສົມມາດ ພົນ ເສນາ ຮອງປະທານສະພາແຫ່ງຊາດ ທີ່ເຫັນວ່າການຮຽນຜ່ານລະບົບທາງໄກ ຍັງບໍ່ມີປະສິດທິຜົນເທົ່າທີ່ຄວນ,

ພ້ອມທັງແນະນໍາໃຫ້ລັດຖະບານສືບຕໍ່ສ້າງ ແລະ ປັບປຸງນິຕິກໍາ ເພື່ອຄຸ້ມຄອງການຮຽນ-ການສອນແບບທາງໄກ, ພັດທະນາຫລັກສູດ ແລະ ສະໜອງອຸປະກອນການຮຽນ-ການສອນໃນທຸກຊັ້ນ, ທຸກສາຍ ເພື່ອໃຫ້ສາມາດຕອບສະໜອງໃຫ້ແກ່ການພັດທະນາຊັບພະຍາ ກອນມະນຸດໃນຍຸກ 4.0 ໃຫ້ມີຄຸນະພາບ.

ຂ່າວ: ສຸພາສະຫວັນ ສີຊະນະມຸງຄຸນ.ຮູບ: ເກດສະໜາ-ອ່າຍຄໍາ.

About admin

Check Also

ເປັນກຳລັງໃຈໃຫ້ຊາວກະສິກອນ!ຜົນຈາກພາຍຸ ເຮັດໃຫ້ນ້ຳຖ້ວມສວນຜັກຂອງຊາວກະສິກອນ ຢູ່ເມືອງປາກຊ່ອງ ແຂວງຈຳປາສັກ.

ເປັນກຳລັງໃຈໃຫ້ຊາວກະສິກອນ! ຜົນຈາກພາຍຸ ເຮັດໃຫ້ນ້ຳຖ້ວມສວນຜັກຂອງຊາວກະສິກອນ ຢູ່ເມືອງປາກຊ່ອງ ແຂວງຈຳປາສັກ. ປັດຈຸບັນ, ນ້ຳຍັງບໍ່ບົກລົງ ຄາດຄະເນຜົນເສຍຫາຍ ຈາກຜັກເໜົ່າ ມູນຄ່າກວ່າ 20ລ້ານກີບນອກນີ້, ຍັງມີສວນກາເຟພວມປູກໃໝ່ເຄິ່ງເຮັກຕ້າ. ຄລິບ ອັບເດດ 29/09/2022(ພາບຂ່າວຈາກ …

Leave a Reply

Your email address will not be published.