ຕຳຫລວດອັງກິດສັ່ງປັບໄໝເງິນ ນາຍົກລັດຖະມົນຕີ-ລັດຖະມົນຕີການເງິນ ຂໍ້ຫາຈັດງານສັງສັນໃນຊ່ວງລັອກດາວທົ່ວປະເທດ

ນາຍົກລັດຖະມົນຕີອັງກິດ ແລະ ລັດຖະມົນຕີການເງິນ ຖືກປັບໄໝເງິນຈາກຄວາມຜິດໃນການລະເມີດກົດລັອກດາວ, ຫລາຍຝ່າຍປະສານສຽງຮຽກຮ້ອງໃຫ້ລາອອກ.

ວັນທີ 12 ເມສາ 2022, ສຳນັກຂ່າວບີບີຊີ (BBC) ລາຍງານວ່າ: ຕຳຫລວດອັງກິດໄດ້ອອກມາຢືນຢັນວ່າ:

ຈະມີການສັ່ງປັບໄໝເງິນ ນາຍົກລັດຖະມົນຕີ ບໍຣິສ ຈອນສັນ ແລະ ພັນລະຍາ ລວມທັງທ່ານ ຣິຊີ ສຸນັກ ລັດຖະມົນຕີວ່າການກະຊວງການເງິນ ຫລັງຈາກພົບວ່າທັງ 3 ຄົນໄດ້ລະເມີດກົດໝາຍໃນຊ່ວງຂອງການລັອກດາວ ເພື່ອຄວບຄຸມການລະບາດຂອງພະຍາດໂຄວິດ-19 ເມື່ອປີ 2020.

ທາງຕຳຫລວດລະບຸວ່າ: ໄດ້ສັ່ງປັບໄໝຜູ້ກະທຳຜິດທັງໝົດ 50 ກວ່າຄົນ, ແຕ່ສະມາຊິກເປີດເຜີຍຊື່ໄດ້ພຽງ 3 ຄົນ ເນື່ອງຈາກລັດຖະບານອັງກິດໃຫ້ຄຳໝັ້ນສັນຍາເອົາໄວ້ວ່າ: ຈະເປີດເຜີຍຊື່ຖ້າວ່ານາຍົກລັດຖະມົນຕີ ຈອນສັນ ແລະ ທ່ານ ສຸນັກ ເປັນໜຶ່ງໃນຜູ້ກະທຳຜິດ.

ຂະນະທີ່ໂຄສົກປະຈຳຕົວ ນາງ ແຄຣີ ຈອນສັນ ພັນລະຍານາຍົກລັດຖະມົນຕີ ກໍໄດ້ອອກມາຢືນຢັນວ່າມີການສັ່ງປັບໄໝນາງ ຈອນສັນ ເຊັ່ນກັນ.

ກ່ອນໜ້ານີ້, ເຫດການດັ່ງກ່າວໄດ້ກາຍເປັນບັນຫາຮ້ອນໃນອັງກິດ ເນື່ອງຈາກຝ່າຍຄ້ານເບິ່ງວ່າ: ເປັນການກະທຳທີ່ບໍ່ເໝາະສົມ ທີ່ຜູ້ອອກກົດໝາຍມາບັງຄັບໃຫ້ຄົນທົ່ວປະເທດປະຕິບັດຕາມ ພັດເປັນຜູ້ລະເມີດກົດເອງ.

ທ່ານ ເຊີເຄຍ ສຕາຣເມີ ຫົວໜ້າພັກເລເບີ ອອກມາກ່າວວ່າ: ນີ້ຄືສິ່ງທີ່ສະແດງໃຫ້ເຫັນວ່າພັກຄອນເຊີເວທີຟບໍ່ມີຄວາມເໝາະສົມທີ່ຈະບໍລິຫານປະເທດອີກຕໍ່ໄປ, ອັງກິດຄວນໄດ້ຮັບສິ່ງທີ່ດີກວ່ານີ້, ທ່ານ ບໍຣິສ ຈອນສັນ ແລະ ທ່ານ ຣິຊີ ສຸນັກ ເຮັດຜິດກົດໝາຍ ແລະ ຂີ້ຕົວະເລື້ອຍໆຕໍ່ສາທາລະນະຊົນ ພວກທ່ານທັງສອງຕ້ອງລາອອກ.

ຂະນະທີ່ທ່ານ ນິໂຄລາ ສເຕີຈຽນ ນາຍົກລັດຖະມົນຕີສະກອດແລນ ເປັນອີກຄົນໜຶ່ງທີ່ອອກມາຮຽກຮ້ອງໃຫ້ຜູ້ນຳອັງກິດລາອອກເຊັ່ນກັນ ໂດຍຊີ້ວ່າ:

ຄຸນຄ່າເບື້ອງຕົນໃນດ້ານຄວາມຊື່ສັດ ແລະ ຄວາມເໝາະສົມ ເປັນສິ່ງທີ່ຈຳເປັນສຳລັບການເຮັດວຽກໃນລະບອບປະຊາທິປະໄຕແບບລັດຖະສະພາ ທ່ານຈຶ່ງຄວນຈະລາອອກໄປພ້ອມກັນລັດຖະມົນຕີຂອງທ່ານ.

ຫລ້າສຸດຍັງບໍ່ມີຄວາມເຫັນໃດໆອອກມາຈາກທ່ານນາຍົກລັດຖະມົນຕີ ຈອນສັນ ແລະ ທ່ານ ສຸນັກ ໃນບັນຫາດັ່ງກ່າວ.

About admin

Check Also

ຜົນກະທົບຮ້າຍຈາກນໍ້າກະທ້ອມ ທີ່ໄວລຸ້ນລາວກຳລັງຮິດ•

😱ຜົນກະທົບຮ້າຍຈາກນໍ້າກະທ້ອມ ທີ່ໄວລຸ້ນລາວກຳລັງຮິດ •ເຊິ່ງທາງເຟສບຸກຂອງ Phonthida Loy ໄດ້ແຊປະສົບການຕົນເອງວ່າ: ຫາກະເຄີຍເຈີກັບໂຕເອງ ຍ້ອນກິນທ້ອມທຸກມື້ ຍ້ອນວ່າຢາກນອນຫລັບ ກິນເບຍໃສ່ຍາມໃດຕ້ອງອັດທ້ອມໃສ່ ຫມູ່ຄູ່ຮູ້ດີ ມາມື້ນີ້ ຂ້ອຍຄິດວ່າຂ້ອຍຊີເຊົາກິນ ເພາະມີອາການ ເມື່ອຍ …

Leave a Reply

Your email address will not be published. Required fields are marked *