Related Articles
ປີ 2023 ລັດຖະບານຈະຄວບຄຸມອັດຕາເງິນເຟີ້ໃຫ້ຢູ່ໃນລະດັບບໍ່ເກີນ 9% —————————————
ທະນາຄານແຫ່ງ ສປປ ລາວ ຈະປັບປຸງ ແລະ ຈັດຕັ້ງປະຕິບັດກົນໄກການຄຸ້ມຄອງເງິນຕາຕ່າງປະເທດຂອງ ສປປ ລາວ ໃຫ້ມີປະສິດທິຜົນ,
ສ້າງຄວາມເຊື່ອໝັ້ນຕໍ່ລະບົບທະນາຄານ ແລະ ສະຖາບັນການເງິນຮູບແບບຕ່າງໆ ແລະ ທັງເປັນກົນໄກໃນການຄວບຄຸມອັດຕາເງິນເຟີ້ສະເລ່ຍໝົດປີ 2023 ໃຫ້ຢູ່ໃນລະດັບບໍ່ເກີນ 9%. ທ່ານ ປອ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານ ລາຍງານຕໍ່ກອງປະຊຸມສະ
ໄໝສາມັນ ເທື່ອທີ IV ຂອງສະພາແຫ່ງຊາດ ຊຸດທີ IX ໃນວັນທີ 7 ທັນວາ 2022, ໂດຍເປັນປະທານຂອງ ທ່ານ ປອ ໄຊສົມພອນ ພົມວິຫານ ປະທານສະພາແຫ່ງຊາດ ເຊິ່ງທ່ານໄດ້ກ່າວວ່າ: ໃນປີ 2023 ລັດຖະບານຖືເອົາການຮັກສາສະຖຽນລະພາບທາງ ດ້ານເງິນຕາເປັນກົກ
ດ້ວຍການດໍາເນີນນະໂຍບາຍເງິນຕາໃນທິດທາງ ທີ່ຮັດກຸມຫຼາຍຂຶ້ນ ເພຶ່ອແນ່ໃສ່ສ້າງກົນໄກທີ່ເຂັ້ມແຂງໃນການຄວບຄຸມຫຼາຍບັນຫາເງິນຕາທີ່ເກີດຂຶ້ນໃນ ສປປ ລາວ ໃຫ້ມີການຄວບຄຸມໄດ້ຕາມລະດັບຄາດໝາຍທີ່ວາງໄວ້ ເຊັ່ນ:
ຄວບຄຸມອັດຕາເງິນເຟີ້ສະເລ່ຍໜົດປີ ໃຫ້ຢູ່ໃນລະດັບບໍ່ເກີນ 9%, ຄຸ້ມຄອງໃຫ້ອັດຕາແລກປ່ຽນເໜັງຕີງສອດຄ່ອງກັບລະດັບດຸນຍະພາບທາງດ້ານເສດຖະກິດ-ເງິນຕາ ແລະ ບໍ່ສ້າງແຮງກົດດັນຕໍ່ອັດຕາເງິນເຟີ້,
ຄວບຄຸມປະລິມານເງິນ M2 ໃຫ້ຂະຫຍາຍຕົວບໍ່ເກີນ 26% ທຽບໃສ່ປີຜ່ານມາ, ສ້າງຄວາມເຂັ້ມແຂງຄັງສໍາຮອງເງິນຕາຕ່າງປະເທດ ໃຫ້ສາມາດກຸ້ມການນໍາເຂົ້າໄດ້ບໍ່ຫຼຸດ 3 ເດືອນ,
ຊຸກຍູ້ທະນາຄານທຸລະກິດສຶບຕໍ່ລະດົມເງິນຝາກ ໃຫ້ຍອດເງິນຝາກທະນາຄານທຸລະກິດບັນລຸໄດ້ 85% ຂອງ GDP,
ຊຸກຍູ້ທະນາຄານທຸລະກິດປ່ອຍສິນເຊື່ອໃຫ້ໂຄງການທີ່ມີ ປະສິດທິຜົນ ໂດຍສົ່ງໃສ່ສົ່ງເສີມການຜະລິດ ເພຶ່ອທົດແທນການນໍາເຂົ້າ ແລະ ສົ່ງເສີມການ ສົ່ງອອກ ເປັນບູລິມະສິດ, ສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ
ເຮັດໃຫ້ຍອດເຫຼືອສິນເຊື່ອຂອງຂະແໜງການທະນາຄານບັນລຸໄດ້ 65% ຂອງ GDP, ຄວບຄຸມອັດຕາສ່ວນໜີ້ບໍ່ເກີດດອກອອກຜົນ ຂອງທະນາຄານທຸລະກິດໃຫ້ຢູ່ໃນລະດັບບໍ່ເກີນ 3%.
ຄຽງຄູ່ກັນນີ້, ຍັງຈະໄດ້ດໍາເນີນນະໂຍບາຍເງິນຕາແບບປະສົມປະສານ ໃນທິດທາງທີ່ຮັດກຸມກວ່າເກົ່າ ເປັນຕົ້ນແມ່ນທົບທວນ ແລະ ປັບອັດຕາດອກເບ້ຍພື້ນຖານຂອງທະນາຄານ ແຫ່ງ ສປປ ລາວ ເມື່ອຈໍາເປັນ ເພຶ່ອຄວບຄຸມປະລິມານເງິນ
, ຄວບຄູ່ກັບການສຶບຕໍ່ອອກພັນທະບັດທະນາຄານ ແຫ່ງ ສປປ ລາວ ເພຶ່ອທົດແທນບ້ວງ 5.000 ຕື້ກີບ ທີ່ອອກໄປໃນປີ 2022 ຕາມຄວາມເໝາະສົມ,
ປັບອັດຕາສ່ວນເງິນແຮຝາກບັງຄັບໃຫ່ສອດຄ່ອງກັບເງື່ອນໄຂດ້ານສະພາບຄ່ອງ ຄວາມໝັ້ນຄົງຂອງທະນາຄານທຸລະກິດ,
ຈັງຫວະການຂະຫຍາຍຕົວຂອງປະລິມານເງິນ ແລະ ການຂະຫຍາຍຕົວຂອງເສດຖະກິດ ພ້ອມທັງຮັບປະກັນການຄວບຄຸມເງິນເຟີ້ ແລະ ອັດຕະແລກປ່ຽນໃຫ້ໄດ້ຕາມທີ່ກໍານົດໄວ້.
ຂໍ້ມູນ: ຄວາມສະຫງົບ
