Related Articles
ຕາມຄໍາແນະນໍາຂອງກົມກົງສຸນ ກະຊວງການຕ່າງປະເທດ ທີ່ເຮັດປ້າຍຕິດໄວ້ຈຸດຫນ້າຫ້ອງສໍາພາດ ລະບຸຂັ້ນຕອນການເຮັດຫນັງສືຜ່ານແດນ (ພາສປອດ)
ມີດັ່ງນີ້:ສໍາລັບ ຜູ້ເຮັດຫນັງສືຜ່ານແດນຫົວໃຫມ່ ຈະຕ້ອງໄດ້ປະກອບເອກະສານລວມມີ:
ສໍາເນົາປື້ມສໍາມະໂນຄົວ 1 ຊຸດ, ຕ້ອງຖື ບັດປະຈໍາຕົວ ແລະ ສໍາມະໂນຄົວຕົ້ນສະບັບມາພ້ອມ (ໃນປື້ມດັ່ງກ່າວຕ້ອງມີຮູບຜູ້ກ່ຽວ ປະທັບກາ ປກສ ເມືອງ),
ສໍາລັບຜູ້ທີ່ມີອາຍຸຕໍ່າກວ່າ 18 ປີ ຕ້ອງມີ ໃບ ອະນຸຍາດຈາກຜູ້ປົກຄອງ ໂດຍເຊັນຜ່ານອໍານາດການປົກຄອງບ້ານ 1 ໃບ,
ສ່ວນຜູ້ທີ່ຈະປ່ຽນຫນັງສືຜ່ານແດນໃຫມ່ ຕ້ອງນໍາເອົາຫນັງສືຜ່ານແດນ ຫົວເກົ່າ ແລະ ສໍາເນົາຫນ້າທີ່ມີຮູບ 1 ໃບ,
ພ້ອມນີ້ຕ້ອງມີຫນັງສືຄໍາຮ້ອງ ເຮັດຫນັງສືຜ່ານແດນ ທີ່ສາມາດໂຫລດເອົາເອງໄດ້ໃນເວັບໄຊກະຊວງການ ຕ່າງປະເທດ http://www.mofa.gov.la/index ຫລື http://www.mof.gov.la/lo/passpoort_application (ເອກະສານລະບຸໄວ້ວ່າ ຫ້າມຂາຍ),
ຂຽນໃສ່ຫວ່າງທີ່ກໍານົດໃຫ້ ແລະ ຕິດຮູບ ຂະຫນາດ 4×6 ພື້ນສີຂາວ ພ້ອມປະທັບການາຍບ້ານ ແລ້ວນໍາເອົາເອກະສານດັ່ງກ່າວນັ້ນ ມາຍື່ນຂໍສໍາພາດຢູ່ກົມກົງສຸນ ດ້ວຍຕົນເອງ ເພື່ອຈະໄດ້ຮັບບັດນັດມື້ສໍາພາດຕາມຄິວ.
ຫນັງສືຜ່ານແດນຈະໄດ້ຮັບພາຍຫລັງສໍາພາດແລ້ວ ໂດຍໃຊ້ ເວລາແຕ່ 10 ຫາ 15 ວັນ (ບໍ່ນັບວັນພັກລັດຖະການ) ໃນລາຄາປົກກະຕິແບບທໍາມະດາແມ່ນ 400.000 ກີບ/ຫົວແຕ່ໄລຍະບໍ່ດົນມານີ້ ໄດ້ມີປະຊາຊົນຈໍານວນຫນຶ່ງສ່ອງແສງມາວ່າ ການເຮັດຫນັງສືຜ່ານແດນ ມີຄວາມຫຍຸ້ງຍາກຫລາຍ,
ໃຊ້ເວລາດົນ ນັບແຕ່ມື້ ຍື່ນເອກະສານ ແລ້ວຕ້ອງລໍຖ້ານັດສໍາພາດ ໄວສຸດກໍແມ່ນ 21 ວັນ ຫລື ເປັນເດືອນກໍມີ, ຍ້ອນມີພວກນາຍຫນ້າມາຮັບເອກະສານ ເພື່ອລັດຄິວ ແລະ ຫາລາຍໄດ້ທີ່ບໍ່ຊອບທໍາ,
ຫາກທ່ານໃດຕ້ອງການຮີບດ່ວນ ແລະ ຕ້ອງການເຂົ້າສໍາພາດພາຍໃນວັນນັ້ນ ຈະຕ້ອງໄດ້ຈ່າຍເງິນໃຫ້ພວກເຂົາ ແຕ່ 1-1,5 ລ້ານກີບ. ດັ່ງນັ້ນ, ຈິ່ງເປັນສາເຫດເຮັດໃຫ້ຜູ້ບໍ່ມີຄວາມສາມາດຈ່າຍເງິນທີ່ມີມູນຄ່າສູງດັ່ງກ່າວ ຕ້ອງໄດ້ລໍຖ້າ ເປັນເວລາຍາວເກີນກ່ ວາກໍານົດ.
ເຖິງຢ່າງໃດກໍດີ ການສ່ອງແສງດັ່ງກ່າວ ອາດບໍ່ມີຄວາມແນ່ນອນ ດັ່ງນັ້ນ, ວັນທີ 9 ກຸມພາ 2023 ນີ້ ທີມງານຂ່າວຫນັງສືພິມລາວພັດທະນາ ຈຶ່ງ ໄດ້ລົງໄປສະຖານຕົວຈິງທີ່ອອກຫນັງສືຜ່ານແດນ ຢູ່ນະຄອນຫລວງວຽງຈັນ ຜົນປາກົດວ່າ ເປັນດັ່ງທີ່ປະຊາຊົນສ່ອງແສງມາ.
ນັບຕັ້ງແຕ່ກ້າວ ຂາເຂົ້າສູ່ເຂດ ທັງນອກ ແລະ ໃນກໍາແພງ ຈະມີກຸ່ມນາຍຫນ້າເຂົ້າມາສະເຫນີເງື່ອນໄຂຄວາມສະດວກໃຫ້ ເປັນຕົ້ນແມ່ນສິດໃນການເຂົ້າສໍາພາດ ພາຍໃນມື້, ສິດໃນການໄດ້ຮັບປື້ມຫນັງສືຜ່ານແດນພາຍໃນ 5 ວັນ ແຕ່ຕ້ອງຈ່າຍເງິນ ຕາມລໍາດັບຄວາມຮີບດ່ວນຢູ່ລະຫວ່າງ 1-2 ລ້ານກີບ ມີທັງ
ບໍລິການເອົາປຶ້ມອອກມາໃຫ້ ຫລື ເຂົ້າໄປຮັບປື້ມເອງແລ້ວແຕ່ສະດວກຂອງຜູ້ຕ້ອງການເຮັດຫນັງສືຜ່ານແດນ (ຄົນຮັບແລ່ນບໍ່ແມ່ນພະນັກງານ ເປັນພຽງນາຍຫນ້າບໍ່ມີສັງກັດ)
.ຈາກເຫດການທີ່ເກີດຂຶ້ນນັ້ນ ຖືວ່າເປັນນຶ່ງໃນບັນດາປາກົດການຫຍໍ້ທໍ້ທາງສັງຄົມ, ອັນສ້າງຄວາມຫຍຸ້ງຍາກລໍາບາກແກ່ປະຊາຊົນ ແລະ ເປັນການກົດຫນ່ວງຖ່ວງດຶງໃຫ້ພາບລັກຂອງການເຮັດວຽກໃນຂົງເຂດລັດມົວຫມອງໄປນໍາ.
ດັ່ງນັ້ນ, ຮຽກຮ້ອງໃຫ້ພາກສ່ວນກ່ຽວຂ້ອງ ລົງຕິດຕາມກວດກາ ແລະ ແກ້ໄຂ ບັນຫາຕ່າງໆນັ້ນໃຫ້ຫມົດໄປ ເພື່ອຄວາມເປັນເອກະພາບ ແລະ ເທົ່າທຽມໃນສັງຄົມ ຕາມເປົ້າຫມາຍ ແລະ ນະໂຍບາຍພັກລັດທີ່ວາງອອກດ້ວຍ.
