Breaking News

ຄັ້ງທຳອິດ ຢູ່ແຂວງສາລະວັນ ພິທີຫລໍ່ພະພຸດທະຮູບ ປາງຊະນະມານ

ແຫລ່ງຂ່າວຈາກແຂວງສາລະວັນ ໃຫ້ຮູ້ວ່າ: ວັນທີ 26 ມັງກອນນີ້, ຢູ່ທີ່ວັດໂພສີສຸວັນນະຣາມ, ບ້ານສະນຶມນອກ ເມືອງເລົ່າງາມ ແຂວງສາລະວັນ ໄດ້ມີພິທີຫລໍ່ພະພຸດທະຮູບ ທອງເຫລືອງ ປາງໄຊຊະນະມານ 1 ອົງ ເພື່ອຕົວແທນຂອງອົງພະສັມມາສັມພຸດທະເຈົ້າ ເພື່ອໃຫ້ພຸດທະສາຊະນິກະຊົນ ໄດ້ກາບໄຫວ້ສັກກະລະບູຊາ ແລະ ທັງເປັນການປະຕິສັງຂອນວັດວາອາຣາມ, ສືບທອດປົກປັກຮັກສາຮີດຄອງປະເພນີຂອງພຸດທະສາສະໜາ ໃຫ້ຍືນຍົງຕະຫລອດໄປ. ເຂົ້າຮ່ວມໃນພິທີຄັ້ງນີ້ ມີ ພະຫລັກຄຳຣັດຕະນະຄຸນາຈານ ຍາທ່ານໃຫຍ່ ສອນໄຊ ແກ້ວເມືອງໃຕ້ ເຈົ້າຄະນະແຂວງສາລະວັນ, ທ່ານ ໂພໄຊ ໄຊຍະສອນ ເຈົ້າແຂວງສາລະວັນ, ມີການນຳຂັ້ນແຂວງ, ການນໍາຂັ້ນເມືອງ, ພຸດທະສານິກະຊົນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ພະອາຈານ ພອນສະຫວັນ ທອງມະນີນິນ ຮອງເຈົ້າຄະນະເມືອງເລົ່າງາມ ເຈົ້າອະທິການວັດໂພສີສຸວັນນະຣາມ ບ້ານສະນຶມນອກ ໄດ້ໃຫ້ຮູ້ວ່າ: ການລົງມືສ້າງພະພຸດທະຮູບ ປາງໄຊຊະມານ ຄັ້ງນີ້ ໄດ້ເລີ່ມມາແຕ່ວັນທີ 22 ມັງກອນ 2021 ຄາດຈະໃຫ້ສໍາເລັດ 100% ໃນອີກ 3 ເດືອນຕໍ່ໜ້າ, ເຊິ່ງອົງພະພຸດທະຮູບມີນໍ້າໜັກ 3 ໂຕນ, ໜ້າຕັກກວ້າງ 2,54 ແມັດ, ສູງເກືອບ 4 ແມັດ ເປັນພະພຸດທະຮູບ ທີ່ມີມາດຕະຖານ, ຖືກຕ້ອງຕາມສິລະປະເອກະລັກຂອງຊາວລາວ.

ພະພຸດທະຮູບ ປາງໄຊຊະນະມານ ເປັນພະຈັດຢູ່ໃນອະຣິຍະບົດ ນັ່ງສະມາທິ ມືຂ້າງຊ້າຍວາງໄວ້ເທິງໜ້າຕັກ, ມືຂ້າງຂວາ ຂວໍ້າລົງທີ່ຫົວເຂົ່າ ແລະ ນີ້ວມືຊີ້ລົງພື້ນທໍລະນີ (ແຜ່ນດິນ), ໂດຍໄດ້ກຳນົດເອົາອະຣິຍະບົດ ຕອນພຣະອົງ ຊົງຊະນະມານ.

ສໍາລັບທຶນໃນການກໍ່ສ້າງ ແມ່ນໄດ້ຮັບຈາກການປະກອບສ່ວນຂອງ ພຸດທະສາຊະນິກະຊົນ, ສິດ-ສານຸສິດ ຫລາຍພາກສ່ວນໃນທົ່ວສັງຄົມ, ການເທທອງເຫລືອງປະສົມຄຳ ຫລໍ່ພະພຸດທະຮູບ ປາງໄຊຊະນະມານ ອົງນີ້ ແມ່ນໄດ້ມີການປັບປຸງ, ຮູບແບບຕາມລັກສະນະຂອງພະພຸດທະຮູບ ຢູ່ໃນແຂວງສາລະວັນ ເພື່ອໃຫ້ເປັນເອກະລັກສະເພາະ ໂດຍແມ່ນທີມງານໂຮງຫລໍ່ພະມໍລະດົກສິລະປະລາວ ເປັນຜູ້ດຳເນີນການຫລໍ່.

About admin

Check Also

ເຕືອນໄພດ່ວນ! ເຂື່ອນໄຟຟ້ານ້ຳອູ ມີແຜນຈະລະບາຍນ້ຳ ໃນວັນທີ 23 ກໍລະກົດ 2021

ບໍລິສັດໄຟຟ້ານ້ຳອູຈຳກັດ-ໂຄງການເຂື່ອນໄຟຟ້ານ້ຳອູ1 ມີແຜນຈະລະບາຍນ້ຳ ໃນວັນທີ 23 ກໍລະກົດ 2021 ແລະໄດ້ອອກແຈ້ງການຄວາມປອດໄພ ໃນລະດັບການແຈ້ງເຕືອນສີຟ້າ ເຖິງອົງການປົກຄອງເມືອງປາກອູ ແຂວງຫລວງພະບາງ ທັງພາກລັດ ແລະພໍ່ແມ່ປະຊາຊົນ ທີ່ອາໄສຢູ່ລຸ່ມເຂື່ອນໄຟຟ້ານ້ຳອູ1 ເຊີ່ງທາງເຂື່ອນໄດ້ແຈ້ງເຕືອນໃຫ້ຊາບກ່ຽວກັບສິ່ງທີ່ຄວນລະວັງ ແລະເລື່ອງຄວາມປອດໄພ …

Leave a Reply

Your email address will not be published. Required fields are marked *